Good Parenting – التربية الصالحة
اسمها تربية صالحة مش تربية حديثة..
كونك تفهم ازاي تجيب طفل وازاي تتعامل معاه وازاي توصله حبك من غير ما تصطاد في المياه العكرة ومن غير هات بوسة واديك شوكولاتة شيء جميل ومميز جدًا
بشوف جمال مش طبيعي في علاقة صافية وناجحة وفيها تفاهم إلى حد كبير بين شخص بالغ وطفل.
والشخص الكبير ده مش أمه ولا أبوه
بتكلم عن أي حد تاني غيرهم، خالته، عمته، صاحبة مامته، مدرس.. أي حاجة
الحقيقة مش محتاجين دراسات عشان نعرف ازاي نتعامل مع طفل من غير ما نجرحه ولا نحرجه ولا نكسره ولا نهدمه ولا أي حاجة، تعلم التربية شيء مهم ومفيد جدًا ولكن لو حد مش عنده الفرصة للاستثمار في كورس او تدريب يبقى كده خلاص مفيش حلول أخرى..؟
"وَالَّذِينَ يَقُولُونَ رَبَّنَا هَبْ لَنَا مِنْ أَزْوَاجِنَا وَذُرِّيَّاتِنَا قُرَّةَ أَعْيُنٍ وَاجْعَلْنَا لِلْمُتَّقِينَ إِمَامًا"
الأطفال من وجهة نظري بتحتاج اننا نحط نفسنا مكانهم وبس.. ومع الوقت بنفهمهم، أنا ممكن أوصل للي أنا عايزاه مع طفل عنده سنة او اتنين او خمسة او عشرة بشكل يرضيني ويكون بإرادته وسعادته وده مش تربية حديثة دي تربية صالحة وصحية
وفي بعض الأحيان الحزم مطلوب وده شيء طبيعي في كل حاجة ولكن بشكل صحيح وصحي للعلاقة بين أي شخص وطفل
أنا مدرستش أي حاجة ليها علاقة بالتربية (ناوية إن شاء الله) ولكن الفكرة ان الاحتكاك بأطفال كتير والتجربة ومتابعة صفحات التربية والنصائح وهكذا ممكن توصلني لنتيجة مقاربة..
الحمد لله معاملتي مع أطفال عيلتي علمتني كتير ووصلتني لدرجة حقيقي جميلة ومختلفة تمامًا في علاقتي معاهم..
بتيجي لحظات مش سهلة والصبر على طفل مش محتمل بس يمكن بناء أساس صحي وصالح ييسر أوقات كتير زي دي. 🌻